مركز الدوق للتصميم جوهرة مخفية بوسط البلد بعدسة Miso Vibes

 مركز الدوق للتصميم ـ ديوانية الخط العربي 🏛️✨

مركز الدوق للتصميم ـ ديوانية الخط العربي

بين زحمة وسط البلد وصخب عمان، في زاوية مخبية بتفصلك عن كل الدنيا، لقيت مركز الدوق للتصميم. هالمكان مش بس ديوانية للخط العربي، هو فعلياً 'آلة زمن' بترجعك لأيام زمان وجمال التفاصيل القديمة. أول ما تدخل، ريحة الورق العتيق وشكل والجرائد المعلقة عالحيطان مع لمسة من المجلات القديمة يلي ربينا عليها رح تخليك تحس براحة وهدوء مش طبيعي، وكأنك بمكان مخصص بس للإلهام.

رمضان خليل حرب ـ نابليون عمّان 

أول ما بتفوت على مركز الدوق رح تلاقي بوجهك مجسم ل رمضان خليل حرب المعروف بإسم نابليون عمّان أو نابليون وسط البلد، كان معلم بارز في عمّان إشتهر بلباس نابليون بونابرت توفي في عام 2012، لكن ذكراه لا تزال حية في ذاكرة المدينة.

حسن أبو علي

على الطرف الثاني من دخولك لمركز الدوق للتصميم رح تلاقي صورة السيد حسن أبو علي وهو مالك كشك الثقافة العربية بوسط البلد عمّان وهو من أقدم وأشهر بائعين الكتب في عمّان، ويعتبر من الشخصيات البارزة في مجال  الثقافة بالأردن.

وأنت بتتمشى بالمكان، عينك رح تلمح كنز حقيقي لعشاق السينما؛ جدران مليانة بوسترات أفلام قديمة مرسومة رسم زي افلام عادل إمام،سعاد حسني،سمير غانم ! فعلياً، 

هاي البوسترات مش بس ورق، هي ذاكرة كاملة لزمن الفن الجميل، من أيام السينما بالأبيض والأسود للأفلام اللي تربينا عليها.التفاصيل بالألوان، وطريقة الخط المكتوب فيها أسماء النجوم، بتخليك تحس بقيمة الفن قبل ما يدخل فيه التكنولوجيا والديجيتال.. 

 كل بوستر فيهم هو لوحة فنية بتستحق إنك توقف عندها وتتأملها.

أما الجرائد اللي مرصوصة عالحيط من الأرض للسقف، فهي حكاية ثانية! الجرائد هاي مش بس ورق مصفر، هي أرشيف كامل لأحداث وأيام مرت على عمان والعالم. وأنت بتطلع عليها، رح تلاقي عناوين أخبار قديمة وصور لمشاهير وقادة من زمان.

وكأن الحيط بيحكي لك قصص التاريخ اللي اندثرت. رصة الورق هاي بتعطي المكان طابع هندسي وفني غريب، بيخليك تحس إنك بقلب مكتبة سرية عمرها مئات السنين

أما عن رف المجلات القديمة يلي بوخدك جولة لطفولتك لتحس بمشاعر الحنين والبساطة يلي كنا بنعيشها لما كنت نستنى عدد المجلة الأسبوعي أو الشهري ينزل.

 رح تلاقي أعداد من مجلات متنوعة زي مجلة ''سيدتي''، "الكويت''وغيرها من المجلات اللي كانت جزء من يوميات الناس زمان. 

ملمس الورق وصور الفنانين والنجوم بجمالهم الطبيعي على الغلافات برجعك لزمن 'الرواق' والأناقة. قعدت أتفرج على العناوين والقصص المكتوبة، وحسيت قديش كانت الحياة بسيطة ومليانة تفاصيل حلوة.. فعلياً، كل مجلة فيهم عبارة عن رحلة قصيرة لقلب الماضي.

واللي فاجأني كمان، إنه المكان مش بس للعرب أو محبي اللغة العربية، رح تلاقي رفوف مليانة كتب بلغات ثانية وأجنبية. كتب قديمة وقصص باللغة الإنجليزية وغيرها.

وكأن المكان بيفتح أبوابه لكل الثقافات بقلب عمان. هاد الميكس بين الخط العربي الأصيل وبين الكتب العالمية بيعطيك شعور إنك بمكان 'كوني'، مكان بيجمع الناس من كل العالم على حب الفن والقراءة والجمال.

المكان والتصميم والديكور برجعلك ذكرياتك اللي ضاعت مع عصر التطور يلي عايشينو بتفاصيل صغير ممكن تصفن وتتذكر وتعيش أحلى مشاعر مشاعر الطفل يلي لسا جواتك

بالنهاية، مركز الدوق مش بس مكان للزيارة، هو تجربة لازم تعيشوها وتشوفوها بعيونكم. إذا كنتم بوسط البلد، لا تضيعوا فرصة إنكم تدخلوا وتعيشوا هالأجواء.. ومين بيعرف، يمكن تلاقوا كتاب أو مجلة ترجعلكم ذكرى قديمة غالية على قلبكم! ✨

Share the Vibes ✨ انشروا الجمال